- Txertoguneek harrera ona izan dute: ehunka pertsonak hartu dute txertoa lehen orduetan, batez ere adinekoek
- Jorge Romeo, Osakidetzako Lehen Mailako Arretako zuzendariordeak, San Martingo txertogunea bisitatu du aurretiko hitzordurik gabeko txertaketaren hasieran
- Txertaketa-puntuak sei hilabetetik aurrera herritar guztientzat zabalik egongo dira, eta azaroaren 1era arte egongo dira martxan
- Gune horiek Osasunaren Euskal Itunak prebentzioa indartzeko eta txertaketarako sarbidea errazteko hartutako konpromisoari erantzuten diote
Arabako, Bizkaiko eta Gipuzkoako txertogunek gaur goizean ireki dituzte ateak, 8:00etan, eta, goiz erdian, ehunka pertsonak hartu dute txertoa. Araban, eskaera handia zela eta, txertaketarako espazio gehigarri bat prestatu behar izan da. Goizak aurrera egin ahala, jendetza handitu egin da hiru lurraldeetan, eta ilarak sortu dira eskari handieneko uneetan, baina azkar konpondu dira.
Txertoa hartu dutenen profil nagusia 65 urtetik gorako pertsonena izan da; horietako askok patologia kronikoak dituzte, eta kasu askotan haien lagunek ere hartu dute txertoa. Gazteak eta haur batzuk ere bertaratu dira, batez ere Araban eta Gipuzkoan.
Jorge Romeo, Osakidetzako Lehen Mailako Arretako zuzendariordea, Gasteizko San Martingo Osasun Zentroko txertogunean izan da astelehen honetan, Osakidetzak hiru lurralde historikoetan gaitu dituen 12 txertaketa-puntuak abian jartzearekin bat.
"Aurretiko hitzordurik gabeko txertaketa-puntu hauekin, herritarrei are gehiago hurbildu nahi diegu txertaketa, gripearen eta COVID-19aren aurrean osasun indibiduala eta kolektiboa babesteko neurri eraginkor baterako sarbidea erraztuz", adierazi du Romeok. " Gainera, Lehen Mailako Arretako kontsultak arindu egiten dira, eta horrek beste osasun-arazo batzuei erantzuteko aukera ematen du", gaineratu du. "Hori guztia erizaintzako profesionalen lanari esker da posible, txertoa hartzea errazagoa eta hurbilagoa baita pertsona guztientzat", amaitu du.
Gune horiek azaroaren 1era arte egongo dira martxan, eta sei hilabetetik gorako herritar guztiei aukera ematen diete gripearen eta COVID-19aren aurkako txertoa hartzea, aurretiko hitzordurik behar izan gabe, puntu espezifikoetan eta ordutegi luzeekin. Ekimenak osasun-zentroetan egiten ohi den txertaketa osatzen du, eta herritarrek dituzten aukerak zabaltzen ditu.
Araban, Bizkaian eta Gipuzkoan daude 12 puntuak, eta Gasteizen, Bilbon, Barakaldon, Portugaleten, Mungian, Amorebieta-Etxanon, Donostian, Arrasaten, Beasainen, Irunen, Eibarren eta Tolosan daude.
Hiriburuetan, astelehenetik igandera, 8:00etatik 20:00etara irekitzen dute txertoguneek, Gasteizen izan ezik, asteburuetan 9:00etatik 21:00etara. Gainerako Erakunde Sanitario Integratuetan, astelehenetik ostiralera ematen da arreta, 15:00etatik 20:00etara.
Txertaketa pertsona bakoitzari dagozkion osasun-gomendioen arabera egiten da. Haurren kasuan, txertaketa-taldeek pediatriako gaitasunak dituzten erizaintzako profesionalak dituzte, arreta egokia emateko eta prozesuaren segurtasuna indartzeko.
"Adineko eta patologia erantsiak dituen jende asko etortzen ari da", azaldu du María de Perosanz, San Martingo txertoguneko erizainak. Adierazi duenez, pertsona horietako asko hitzordurik gabe joaten dira, erosoago ikusten dutelako, eta hori da txertaketa-puntu horien abantailetako bat.
Txertaketa-kanpainak gripearen aurkako txertoaren 223.503 dosi eta COVID-19aren aurkako 142.255 dosi pilatu ditu Lehen Mailako Arretan, eta kopuru horiei gehituko zaizkie txertoguneetan datozen bi asteetan emango diren dosiak. Gainera, Osakidetzak 279.000 hitzordu baino gehiago erregistratu ditu gripearen aurkako txertoa jartzeko; horietatik 21.400 baino gehiago haurrei dagozkie, eta 1.200 baino gehiago haurdun dauden emakumeei.
Erizaintzako taldeak funtsezkoak dira txertogunen funtzionamenduan: hitzordurik gabe iristen diren pertsonak hartzen dituzte, bakoitzari zer txerto eman behar zaizkion baloratzen dute eta txertoak jartzen dituzte. Kanpaina indartzeko, Osakidetzak erizaintzako 225 profesional eta administrazioko 85 profesional kontratatu ditu, eta horiek ohiko taldeetan sartzen dira.
Espazio horiek gaitzea Osasunaren Euskal Itunaren helburuetan kokatzen da, hau da, herritarrengandik hurbilago dagoen osasun-sistema baterantz eta herritarren beharretan oinarritutako sistema baterantz aurrera egiteko helburuan, pertsona ahulenei arreta berezia eskainiz.
Txertoa hartzea, guztion eskura
Osasun Sailak eta Osakidetzak txertoguneetara joateko deia egin diete herritarrei, azaroaren 1era arte gripearen eta COVID-19aren aurkako txertoa hartu dezaketelako aldez aurretik hitzordurik egin gabe. Nahiago dutenek osasun-zentroan hitzordua eskatzen jarrai dezakete. Gogorarazi dute txertoa hartzea dela gripearekin lotutako konplikazioak, ospitaleratzeak eta heriotzak prebenitzeko neurririk eraginkorrena, eta bereziki gomendatzen diete 60 urte edo gehiagoko pertsonei, gaixotasun kronikoak dituztenei, haurdun dauden emakumeei eta sei hilabete eta bost urte bitarteko haurrei, besteak beste. Txertoa hartzeak norberaren eta inguruko pertsona kalteberen osasuna babesten du.
Txertoa hartzeaz gain, gripearen, COVID-19aren eta beste arnas birus batzuen kutsatzea murrizten duten ohitura batzuk mantentzea komeni da: eskuak maiz garbitzea, espazio itxiak aireztatzea, lanera eta ikastetxera ez joatea sintomak badaude eta maskara erabiltzea beharrezkoa denean pertsona ahulenak babesteko.
Txertoguneak: urriaren 19tik azaroaren 1era
Bi astez, herritarrek hitzordurik gabeko txertaketa-puntuak izango dituzte Araban, Bizkaian eta Gipuzkoan:
ARABAKO ESIan
- Txertoa jartzeko lekuak: San Martingo Osasun Zentroa
- Ordutegia: astelehenetik ostiralera, 8:00etatik 20:00etara. Larunbatetan eta igandeetan, 9:00etatik 21:00etara
BILBO-BASURTUKO ESIan
- Txertoa jartzeko lekuak: J. Saenz de Buruaga Osasun Zentroa
- Ordutegia: astelehenetik igandera, 8:00etatik 20:00etara.
DONOSTIALDEKO ESIan
- Txertoa jartzeko lekuak: Groseko Anbulatorioa
- Ordutegia: astelehenetik igandera, 8:00etatik 20:00etara.
BARAKALDO-SESTAOKO ESIa
- Txertoa jartzeko lekuak: San Eloy Ospitalea
- Ordutegia: Astelehenetik ostiralera, 15:00etatik 20:00etara.
EZKERRALDE-ENKARTERRI-GURUTZETAKO ESIan
- Txertoa jartzeko lekuak: Errepelegako anbulatorioa
- Ordutegia: Astelehenetik ostiralera, 15:00etatik 20:00etara.
BARRUALDE-GALDAKAOKO ESIan
- Txertoa jartzeko lekuak: Zornotzako Osasun Zentroa.
- Ordutegia: Astelehenetik ostiralera, 15:00etatik 20:00etara.
URIBEKO ESIan
- Txertoa jartzeko lekuak: Mungiako Osasun Zentroa
- Ordutegia: Astelehenetik ostiralera, 15:00etatik 20:00etara.
BIDASOKO ESIan
- Txertoa jartzeko lekuak: Irungo Erdialdeko Anbulatorioa
- Ordutegia: Astelehenetik ostiralera, 15:00etatik 20:00etara.
DEBABARRENEKO ESIan
- Txertoa jartzeko lekuak: Torrekuako Osasun Zentroa (Eibar)
- Ordutegia: Astelehenetik ostiralera, 15:00etatik 20:00etara.
DEBAGOIENEKO ESIan
- Txertoa jartzeko lekuak: Arrasateko Osasun Zentroa
- Ordutegia: Astelehenetik ostiralera, 15:00etatik 20:00etara.
TOLOSALDEKO ESIan
- Txertoa jartzeko lekuak: Tolosako Osasun Zentroa
- Ordutegia: Astelehenetik ostiralera, 15:00etatik 20:00etara.
GOIERRI-UROLA GARAIKO ESIan
- Txertoa jartzeko lekuak: Beasaingo EAGa
- Ordutegia: Astelehenetik ostiralera, 15:00etatik 20:00etara.
ARABAKO ERRIOXAKO ESIan
- Txertaketa-puntua: agendak indartzea ohiko zentroetan
- Ordutegia: Astelehenetik ostiralera, 15:00etatik 20:00etara.
Informazio gehiago Irekia atarian (Leiho berrian irekiko da)